功夫傳奇 - 決戰邊疆 <武泰無懼>

今集主持Jerry會以詠春技法和古泰拳高手比試下.
無可否認, 古泰拳打法比較全面, 攻擊角度, 招式變化真係值得研究分析.

正如Jerry所講, 身體上被打傷嘅沖激都不及被人家功夫臣服嘅震撼大.
就好似賽車連人地車尾燈都見唔到咁.
所以詠春門人絕對唔可以固步自封, 自我陶醉
而且要多分析, 研究別人嘅功夫,
對自己武術上嘅修為亦有幫助.

今集節目令自己亦有啟發, 所以誠意推薦大家入去睇睇.

功夫傳奇 - 決戰邊疆 <武泰無懼>

Sifu Kelvin

詠春拳教學分享

詠春心法 - 以退為進

初學雙黐手時, 好多時因為唔慣咁近距離嘅攻擊,
必定以死力抗衡對方, 好讓自己覺得安全.
這階段在剛開始時是可以理解同接受的.

但隨著不斷嘅練習, 而練習者亦會慣性地以此方式繼續其詠春發展方向.

當時間一長, 他們會發覺自己嘅功夫好像無咩進步, 最多係動作熟練咗而已.

問題在於之前一直用慣死力抗衡, 完全沒有透過黐手練習時, 感受及接收對手俾出黎嘅攻擊訊號. 以死力這種"即食技巧"為理念及策略, 除非你呢一世都唔同D勁過你嘅人黐手, 

或者諗住成世恰"o靚仔", 否則會輸得好慘, 俾人打得好金!

唯一可以改善(如果仲想提升技巧)嘅方法就係"以退為進"!!!

試下搵D"信得過"嘅練拳Partner, 你同佢黐手, 你自己只可以守, 唔可以攻.

就算對手出錯, 有好位置打都唔可以攻, 要忍手.

要迫自己透過黐手時, 去完全感受及接收對手俾出黎嘅攻擊訊號,

當你可以完全掌握對手嘅攻擊訊號, 如力量, 方向, 位置, "目的地"嘅時候,

你可以試返正常黐手, 到時你就會領悟到另一個層次!

Sifu Kelvin

詠春拳教學分享

學拳年紀的考慮

我知道有好多上班族或者年紀再成熟一點的朋友(如四五十歲)都對學詠春或其他中國武術有興趣。

奈何總覺得自己呢個年紀先嚟學好似太遲， 要學就應該小朋友時代學， 又驚自己跟唔上， 是學得慢， 連累其他人， 體能捱唔到等…(下刪幾億個理由.)
其實想學， 又何需顧累咁多。

作為成年人, 只要家庭和工作上配合， 其他應該不是問題。

最重要自己知道點解想學， 點解要學?

依家唔學, 將來會唔會後悔?

我成日同我d學生講， 你今日唔學， 10年後回望， 自己都係咩都無學過。 

相反人地今日開始學， 10年後未必能成為高手， 但一定好過無學嗰個。

在香港， 我們又唔係學嚟上擂台搵食， 又唔會俾人踢館尋仇， 純為自己興趣出發，

點解要俾自己咁多籍口去逃避。

今天就為自己的理想同興趣行動吧!!!

Sifu Kelvin
詠春拳教學分享

詠春心法 - 步法和身法比手法更重要

很多人練習詠春都很注重手法嘅運用,
呢一招點樣消對方嘅攻擊,
那一招又可以點樣連消帶打等等.
但就忽略了步法和身法嘅運用同訓練!
(俗語話"有手無馬"就係呢D)

(請留意黑衫者每次攻擊, 只留於表面,

殺傷力有限. 如對手只要退馬半步, 剛才嘅進攻已徒勞無功)

老實說, 除非對手真係太弱, 可任由你唔洗上步入馬,
用d所謂手法喺佢面前"揚嚟揚去"都叫做打到人;
否則遇著個有料嘅, 人地只要轉少少身, 退半個馬, 回返2拳,
你就已經可以收工.

有時同學員或師弟進行黐手練習時,
發覺好多都只在乎打唔打到人,
但就完全唔理自己身法是否正確,
步法是否進退有序.
大家要明白我們現在練的詠春,
不是上擂台, 以點數攞分爭冠軍用的,
就算俾你打到一百幾十拳,
對方可能都無咩損傷.

要練真正實用實戰嘅詠春,
就應該注意每次出手,
身法, 步法是否配合到手法.
認真, 耐心去研究, 分析每個動作,
如有上步和無上步打同一招是否效果一樣.
只有用心去探討身法, 步法嘅運用,
你便會明白點解手法唔係最重要.
正所謂"處處無手處處手",
打人唔一定要用手的!!!

如以無效嘅方式(得手法, 無身法無步法) 練落去,
最多只練到華而不實嘅詠春,
外行睇上去或者叫做"型",
但"行家一出手, 便知有沒有".
所以希望大家除練習手法外,
更應多練習步法同身法嘅運用!

Sifu Kelvin

詠春拳教學分享

詠春心法 - 黐手黐得好唔等於實戰勁

黐手 - 學習詠春拳必經嘅訓練, 亦是詠春拳精粹之一.

好多門人以為黐手黐得好, 黐得叻, 完全封晒對方嘅攻擊門路,
控制晒對方線位, 角度, 位置就等於實戰無敵.

老實說, 黐手練得好確實對實戰一定有幫助, 但就唔係絕對.

因為黐手只是一個訓練過程/環節, 當中有其局限嘅地方.

1. 黐手招式
    詠春黐手是要求黐住黎打. 相信唔會有/比較少人在黐手時用其他拳術,

    如掛, 哨, 插, 拋拳, 因為動作大, 在黐手過程及距離時用得唔好, 一定給打個正.

    所要通常只運用詠春拳嘅招式, 

    但實戰時你唔會知對手學過什麼功夫,

    所以如只 陶醉黐手時嘅威風而缺乏實戰訓練,

    到實際運用時, 還是會被打敗的.

2. 黐手距離

    因為與對手黐手距離只有約一尺, 但實戰時對方可以用遠距離策略進攻, 

    如只習慣在近距離攻擊而缺乏遠距離對戰, 到時便會手足無惜.

3. 實戰經驗

    黐手練習經驗絕不能當係實戰經驗.

    有些門人以為自己日日黐就有足夠實戰經驗,

    但真係運用時, 可能俾人一腳 Turning Kick, 或掛哨插便KO了!!!

總結, 黐手確是詠春拳非常實用嘅訓練,

讓學員有效訓練出自然嘅進攻及防守反應,

靈活運用及發揮詠春拳理, 如角度, 線位, 位置等!!!

但希望學員不要以為自己黐手略有小成,

便自我陶醉, 以為天下無敵, 固步自封!!!

Sifu Kelvin

詠春拳教學分享

小念頭 - 第一節

小念頭共分三節, 第一節由下門較剪, 一攤三伏, 到正掌收拳.

其中"一攤三伏"更是詠春拳當中的精粹, 練得好, 功力隨時間增長;
練得唔好, 就等於白練, 浪費時間。

(徐尚田師傅小念頭， 第一節由0：00 ~ 2：22)

練習重點:
1. 立正, 收拳, 屈膝, 開二字箝羊馬
2. 下門較剪, 上門較剪, 收拳 (上, 下較剪手法除了給初學者"中線"概念外, 其實亦可以散手方式用於實戰)
3. 左拳放心口, 打出日字沖拳, 然後放鬆, 拳變攤手, 沉踭聚勁於手踭及腳跟, 手腕由內向外打圈270度, 收拳.
4. 右面(同步驟3一樣)
5. 左拳變攤手, 手踭沿著左胸推出 (記得係用手肘力推, 唔係手腕力). 前臂放鬆, 直至推到手肘離身體1~1.5個拳頭位(視乎練習者身高及手長比例)
攤手推出時, 不可超過中線.
6. 攤手圈手轉抌手
7. 用手肘力, 沿著中線, 拉回抌手返身體.
    (注意: 成個抌手結構需一直保持結構力,  不可鬆懈.)

8. 當抌回到身體約一個拳頭距離， 

    抌手放鬆轉為伏手

9. 手肘貼住身體， 伏手掌心對住自己心口位置，

    用肘底力向前推出

    (重點提示： 伏手手腕一定要放鬆， 不然會練壞手勢， 

                         黐手時伏手就會做唔到貼伏在對手手上，

                         做唔到防衛及感應對手的功用)
10. 當伏手推到手肘離身體1~1.5個拳頭位時, 伏手圈手轉抌手
11.  跟步驟7一樣
12. 推伏手共3次
13. 當抌手第三次回到身體約一個拳頭距離時，左手向右方拍出側掌
       (注意: 拍手不可以拍過肩膀)
14. 側掌拍出後， 馬上打出正掌
       (注：有些支系會在打出側掌後先收回中線， 然後才打正掌。)
15. 正掌打出後， 放鬆前臂， 沉肘轉為攤手
16. 圈手收拳
17. 右面(和步驟5至16一樣， 只是用右手打出)

Sifu Kelvin
詠春拳教學分享

學拳的胸襟

學拳時大部份時間都會和不同師兄弟切礎交流, 唔知大家有無遇過以下情景? 

<情景一>
小師弟同某師兄黐手, 技術同經驗當然不及對方, 技不如人, 俾對方剷下頸, 中幾下拳頭亦無可口非. 黐完手後小師弟虛心請教對方有咩需要改善, 指導一下. 師兄招牌對白:"玩得ok啦, 玩耐d 就得架喇, 無咩問題..." "但我d 手係咪太硬呢? 剛才你用那個手法可以點消呢?""我都唔係好識架, 玩得多就自然識架喇..."

 <情景二>
某師兄同師弟黐手, 開始前再三提點"要放鬆d 呀, 記住唔好用力, 用力就學壞手喇..." 師弟當然百份百信晒師兄放鬆咁黐, 但師兄就出盡九牛二虎之力狂打對方, 以顯"地位". 黐完師弟問, 點解唔係放鬆黐手嗎? 師兄答, 係呀我好放鬆架喇, 你未練得好, 咪消唔到囉, 俾d心機練啦... 

唔知你有無做過呢d"師弟"? 我就做過了.
學拳生涯中, 見過唔少呢d"師兄", 專恰d 新仔. 俾你打完當交學費, 提點下可以嘛?
當然唔會. "教識咗你之後邊度有活靶練野""遲d俾你打到我,我仲有面..." 

呢d師謂師兄, 其實學到某個程度就進步空間不大. 1. 自己已滿足現狀, 唔洗再點練都好好打(自己覺得), 2. 自知能力不足, 又突破唔到, 唯有搵方法"教導"下d新人, 唔好俾佢地叻過自己, 以保住"師兄好犀利"嘅美譽同光環! 的確有人用以上手段趕走咗唔少師弟, 尤其潛質好個d, 趁你未"成形"就更加要打到你服佢, 或怕咗佢唔學! 

其實學拳就等如學做人, 修拳如修心; 品格唔好, 打得叻有咩用, 最慘仲要係唔叻個隻! 人地尊重你一聲"師兄", 何不大家分享一下學拳心得, 等後輩唔洗好似自己咁, 走少d怨枉路, 大家可以一起進步, 把詠春發揚落去; 而唔係驚人叻過自己, 用d下三流手段打到人服佢, 以保自己高高在上嘅"地位"! 

老實說, 依家歐美同俄羅斯嘅練詠春者, 已玩得好過好多香港同中國人.
點解外國人可以咁短時間內"集體"進步得咁快? 除咗勤力練之外, 就係著重分享同研究. 大家練到有咩問題或心得, 就攞出黎分享, 大家就可以用最有效嘅方法去練, 自然進步得快.

如果我地香港人仲用埋d 古老封建自私嘅思想, 固步自封, 陶醉於自我感覺良好嘅空間, 唔洗10年, 詠春便衰於港, 盛於外邦, 我們的下一代便要搵返外國人教詠春了!



Sifu Kelvin
詠春拳教學分享

武術頻道

詠春試堂

市面上有些師傅會提供試堂; 有些則"非誠勿擾", 交咗學費先講. 其實兩種都無問題, 沒有邊種係適合唔適合.

我自已倒沒有所謂, 你有興趣可以上嚟睇睇, 落場玩下都無仲得. 學拳同教拳都會有自己嘅目標同原則. 有時試堂可以提供到一個緩衝區俾大家. 

有些性急學生諗住學3個月變<葉問>, 一個打十個, 佢黎到試堂後發覺原來要學基本功, 再學進退馬, 再學...大家知道理念不同, 無謂浪費大家時間. 好處係我又無收學費, 佢明白咗唔係佢杯茶, 大家可以"因了解而分開", 不留任何瓜葛. 我倒不喜歡有些人當初滿腔熱誠交晒學費, 以為一上堂就可以變<葉問>, 點知一切由基本功學起. 到時佢學得唔開心, 我亦教得無癮, 最後不歡而散仲無謂. 如果有興趣學詠春嘅朋友, 想真正學之前了解咩係詠春, 可以過嚟睇睇, 無任歡迎!


Sifu Kelvin 
詠春拳教學分享

武術頻道

詠春心法 - 消除恐懼(二)

要刻服恐懼, 當然唔係一時三刻可以解決,
但日子有功就一定能做到.

大家可試下以下方法:
1. 熟練每一種手法
     好多時練習者未能掌握到每種手法嘅要點, 唔夠熟練, 

     到運用時當然會驚, 用咗死力都唔知.
     例如練習用搒手卸走對方拳道, 未熟習者因為"驚"俾人打,
     多以死力去谷實前臂, 甚至將肩膀至手腕全部"鎖死"去"迎戰".
     完全做唔到搒手前臂要"鬆", 力點在手肘嘅要求.

     在這種情況下練習, 當然會用死力. 日子有功, 以為死力才是"王道".

2. 找個"溫文"嘅練習拍檔
    有時上課時練習, 會遇到d 比較"匈狠""戰意甚高"嘅師兄, 佢未出手你都已經驚咗, 

    又點會放鬆到, 點會克服到恐懼.
    如可以的話, 找個"友善"嘅拍檔, 盡量以放鬆嘅心情練習, 自自然然可以鬆容不迫練習到手法,   

    掌握到拳嘅距離感. 日子有功, 最"基本"嘅恐懼已可消除.
    隨著自己已建立嘅信心同技術, 再一步一步搵d匈狠嘅師兄練習, 再將以前嘅恐懼一一消除.   

    不然, 只同"溫文"拍檔已滿足狀況, 你嘅功夫進步極都有限.

3. 多練小念頭
     除可把基本手法練熟, 最主要是訓練練習者習慣隨時都可以放鬆心情, 平靜心境. 當遇敵時, 

     可冷靜睇清情況, 準確判斷下才出手. 雖則未必要主動攻擊, 但至少可以冷靜防衛.

    老實說, 學拳的有邊個未被人打過, 食個拳頭. 而詠春嘅特點在於窄小空間內運用, 練習時嘅 

    壓迫感較其他功夫更大, 如刻服唔到呢種恐懼, 日後嘅進步空間都唔會大!

Sifu Kelvin
詠春拳教學分享

武術頻道

詠春心法 - 消除恐懼 (一)

初學詠春手法, 單黐手, 雙黐手時,
好多人都會不自覺用咗死力, 有咁多力就谷咁多力. 即使師父, 師兄提點了, 仍改善唔到,

最大問題係練習者自已已覺得是在最放鬆, 最唔用力嘅狀態, 但實情係自己用咗死力都唔知.

點解練習者覺得自已係最放鬆,  但又用咗死力呢, 答案就係 "驚" 或者"恐懼".
例如剛學習"攤手消直拳"時, 攤手者一定用九牛二虎之力"格"對方, 唔係"消"對方.
因為1.距離近, 與對手只有約一尺空間, 覺得擋唔到實俾人打中; 2. 怕俾人打, 基於自我保護意識啟動, 就會不知不覺用咗拙力去擋, 但這正正是學詠春嘅大忌!

學習詠春, 第一件事就係要消除呢種恐懼. 詠春嘅特性是在埋身短橋嘅空間環境下對敵, 

對方拳頭往往差一寸或更少便會打到自已, 想詠春有進步, 便要搵方法刻服呢個"心魔".

Sifu Kelvin
詠春拳教學分享

武術頻道

上課時間

時間: 逢星期日 10:00AM ~ 12:00PM
地點: 尖沙咀 九龍公園室內運動場側

如有學習詠春上嘅疑問, 或課程查詢,
歡迎電郵至 sifukelvin@yahoo.com.hk

Sifu Kelvin
詠春拳教學分享

武術頻道

詠春手法 - 攤手

詠春手法 - 攤手

攤手 - 詠春入門手法. 主要用於防範對手向我方正面嘅中路(肩至胸部)攻擊.
基本上可視為防衛手, 預備式; 但其實亦可用於攻擊(向對方頸部攻擊).
外觀上只係一手手掌攤開平放, 另一手放於心口做護手.

自從<葉問>系電影熱爆後, 其他電影電視但凡講到詠春, 都會以攤手為招牌動作.

(正確示範)

事實上, 攤手要做得好, 當中大有學問, 先講定型位置.
(以左手為攤手) 左手肘與身體約1~1.5拳頭位, 手肘盡量埋中線 (至少唔可以飛踭) 前臂向前伸出, 手掌與前臂需成一直線, 不可彎曲! (手腕彎曲即表示你d力放咗o係手腕, 肘底力散咗, 黐手時容易俾人借力, 人地一索手, 包你向前卜直)
指尖高低位置, 應在肩水平附近 (攤手放得太低, 基本上就防衛唔到, 一拳直入心口; 放得太高, 一定無結構力, 肘底力, 一拍一推即散!

攤手結構講求三角力, 由手腕, 手肘至肩膀.
位置正確, 自然可以放鬆運用到結構力 ;
位置不正確, 咪要用死力嚟谷住前臂, 但效果卻事倍功半呢!

(是否正確, 一睇就知)

整個動作, 力點在手肘, 不是在手腕, 也不是在前臂.
前臂與手掌只需保持結構即可, 無需谷住d 力.
最後記得放返隻護手! 詠春手法一定係兩手一起"做事".
"無事"做的手就做返護手, 不可"懶惰"!



Sifu Kelvin

詠春拳教學分享

武術頻道

小念頭的重要

小念頭的重要

葉問系詠春拳套路共有三套 - 小念頭, 尋橋 及 標指.
而小念頭雖則是入門的第一套路, 手法簡單直接,
但其實內裡包含博大精深及影響深遠的詠春拳理及哲學.
有習詠春幾十年嘅資深前輩, 仍然覺得對小念頭內在意義未能看得透徹,
每天亦不忘練習及研究!

小念頭是給初學者朝形(正面迎戰對手)嘅練習同慨念.
小念頭練得不好, 日後練習其他技法或套路, 總會覺得事倍功半, 未如理想!

小念頭共分三節, 每節都有其練習目的及特性. 初學者除了要勤力練習外, 亦需確保以正確手法去練; 不然, 練壞手/錯手的話, 要改返正比無練的更痛苦, 條路更漫長!

練習小念頭另一目的, 可以訓練出詠春嘅內勁. 如能掌握到詠春內勁嘅運用,
對日後黐手及套路演練時, 更能得心應手.

Sifu Kelvin

詠春拳教學分享

武術頻道

詠春馬步 - 二字箝羊馬

初學詠春, 第一堂一定係學開馬 - 二字箝羊馬.
留意到好多練習詠春的, 尤其初學者, 練了一段時間,

仍未能掌握到當中要領, 以致馬步不夠穩固, 影響日後練習及運用上的發展.

正如雷師傅示範 (功夫傳奇 - 詠春無華), 開二字箝羊馬會有以下步驟:
1. 全身立正 - 由頭, 腰至腳踭需成一直線 (上身不能向前或後傾, 屁股不能"特"出)
2. 收拳至胸 - 前臂與地面平衡, 手踭盡量拉到最後
3. 屈膝 - 屈膝後的高度需一直保持, 不能時高時低 (頭, 腰至腳踭仍保持一直線)
4. 腳踭固定, 腳尖向外各開45度
5. 腳尖固定, 腳踭向外各開45度
6. 箝膝 (膝不可向外張開)
7. 完成後, 腳應比肩略寬 (視乎身高比例而有所調整, 如腳長者, 腳同肩寬比例會更大)
8. 最後將尾椎骨稍稍的往前收 (即是將屁股向前收起)

(正確圖示)

常見開馬問題:
1. 上半身向前傾, 以膝承受上身體重
2. 上半身向後傾, 一推即散
3. 屁股"特"出
4. 腳寬太窄, 站不穩
5. 腳寬太闊, 變成"死"馬, 靈活度大減



Sifu Kelvin

詠春拳教學分享
武術頻道